Sunday 29 June 2014

hamd sharif

Ramzan Mubarak!!!


HAMD SHARIF,,,,,,,,

sare jahan main tera noor hai, Allahhu
Ishq hai mera,mera suroor hai ,Allahhu.

Aadhe adhure chand, sitare,suraj hain,
Tera jalwa hi bharpoor hai, Allahhu.

Tere bina main khali bartan jaisa hun,
Mere undar tera zahoor hai,Allahhu

Kisme tab hai jo tera deedar kare,
Aik jhalak bhi teri Toor hai , Allahhu.

Main bekhud mastana teri masti main,
Dil ye tere nashe main choor hai, Allahhu.

Main shahon ko kab khatir main lata hun,
Mere andar tera ghuroor hai ,Allahhu.

Tu usko mukhtar bana hi deta hai,
Sabke aage jo majboor hai, Allahhu.

Main nadan ibadat teri kya janu,n,
Mera to bas ik dastoor hai , Allahhu.

Tere naam ki qadr-o-qeemat kitni hai.
Mujhko itna kahan shaoor hai ,Allahhu.

Yun tune abad kiya hai mera Dil,
Mere andar Noor hi Noor hai, Allahhu.

No comments:

Post a Comment